| 農曆新年注意事項（貓貓篇） |
|
農曆新年注意事項（貓貓篇）
就嚟過農曆新年啦!相信大家都會喺新年之前清洗打掃同佈置家居， 有毛孩嘅家庭就要特別注意以下幾點啦！
1.全盒要冚好
相信大家都會準備精美嘅全盒，而個蓋一定要冚好。 因為入邊形形色色嘅糖果包裝對貓貓來講係極具吸引性嘅玩具， 佢哋會忍唔住拎黎玩，有機會會誤食，導致窒息或引致其他腸胃問題。 如果屋企有小朋友嚟拜年，就要照顧好貓貓同埋小朋友嘅相處。 有時小朋友會想同貓貓分享手頭上嘅零食，例如魷魚絲， 但係人食嘅零食對貓貓嚟講味道太重， 會對貓貓嘅消化系統造成好大負擔。
2.預留隱秘空間
過年會有好多親戚嚟拜年，
人多嘅環境會令貓貓感到不安同緊張>_<""。 記得要檢查好窗網係咪牢固 同準備一個隱蔽嘅位置俾貓貓可以躲藏。
3.吊飾位置要諗好
唔少嘅新年掛飾都有流蘇。對貓貓來講，流蘇係佢哋嘅逗貓棒!!! 因此主人要小心擺放有流蘇嘅吊飾或其他新年掛飾。 盡量避免放喺窗邊、花瓶旁邊或電器旁邊， 避免造成財物損失及降低貓貓受傷嘅機會。
4.慎買賀年花
過年大家都會買唔同嘅賀年花佈置家居，但以下幾種植物就要避免啦： 1. 百合花：百合花嘅花葉、花粉同花瓣， 可導致貓貓腎衰竭或嘔吐、嗜睡、食慾不振等。掌掂到百合花， 再舔嘅話，毒素就可能進入體內，如果無接受治療， 就會在36到72小時內毒發，甚至死亡。 2.文竹：貓貓掂到碰到文竹嘅話，可能因刺激引發皮膚炎、口舌炎等。 3.黃金葛/萬年青：萬年青含有神經性毒素，貓狗中毒後會不停咁流口水， 甚至出現四肢共濟失調等症狀。人類誤食會造成嘴唇紅腫、肚屙， 皮膚掂到可能會發炎。 4.一品冠(仙客來)：花嘅球莖具毒性，會導致貓貓腹瀉、嘔吐、癲癇等。 5.蔓綠絨(春羽)：蔓綠絨會刺激動物嘅口腔、舌頭、嘴唇。 貓貓可能會因此流口水、嘔吐或吞嚥困難。 6.發財樹(馬拉巴栗): 咬食或接觸會引致貓貓嘔吐或腹瀉。 蘆薈：可能會引起貓狗嘔吐或屙淡紅色嘅尿。 水仙花、菊花、牡丹、繡球花、鬱金香及風信子等花卉， 都會令貓咪中毒，大家揀花時要多多注意。
5.回鄉時長要留神
有唔少家庭選擇係過年期間回鄉探親。呢個時候，就要 小心唔好獨留貓貓自己一個喺屋企。如果係寄放朋友屋企， 就要留意對方係咪已經裝好左窗網。如果係選擇寵物酒店， 就要留意酒店係咪安全可靠同埋內部嘅衛生狀況。
最後，BCPETS祝大家有個平安健康嘅歡樂年!!!
|
