貓狗要刷牙?幾耐刷一次?點樣刷先啱呀?
無錯，貓貓狗狗都係要刷牙架！唔好以為佢地唔會有牙石，或者唔會有牙周病！
同一人樣，貓狗都會有牙齒問題，好多主人好容易就忽略左，去到最後要麻醉先可以洗返靚啲牙仔，嚴重的話甚至會流牙血，到最後要剝埋牙仔添！
牙齒影響外觀、口氣等問題固然要正視，但最最最重要係牙仔入面有好多微絲血管，細菌有機會透過微絲血管進入心臟，造成健康問題，所以主人真係要做好預防呀！
點先可以做好預防?
一般黎講幾乎所以有貓狗都唔鍾意人地整佢個嘴，所以應該喺佢地仲細既時候多啲掂下佢地個嘴仔，俾時間佢地習慣同適應。
記住每次練習都係一個好大既進步，所以適當既獎例係好緊要架！適當既時候可以獎下小食，要俾佢地知道原來點下嘴仔係一件開心事，慢慢佢地就會習慣俾您整個嘴仔。
當佢地習慣左您用手指點佢地啲牙仔，就可以配合埋牙膏喇。
**注意一定要用寵物用牙膏，切忌用人用嗰啲牙膏呀！**
寵物牙膏有不同味道，例如雞肉、三文魚、麥芽味等都可以吸引到佢地。
初初可以擠少少牙膏喺你手指頭上，等佢地接受同習慣左牙膏既味道先。
之後就可以用手指配合少少牙膏，慢慢刷下門牙先，然後再向入刷，除左要清潔牙齒表面，記住一定要刷牙齒與牙肉之間既牙縫呀，因為牙縫就係細菌最鍾意匿藏既地方！
等佢地習慣左刷牙之後，就可以改用紗布、手指刷或者牙刷，配合牙膏同佢地刷牙喇。
一般揀牙刷都係要揀軟身啲，刷起上黎就無咁唔舒服。另外牙刷都有分唔同Size同形狀架，所以揀既時候要好好考慮！其實每日刷牙就係最理想, 但如果真係太忙都盡量隔日幫佢刷就最好。
如果貓狗真係唔俾刷牙點算?
咁潔齒骨同小食就大派用場！雖然效果一定未及刷牙好，但記住有做好過無做，起碼佢食緊小食既時候都可以減少到細菌積聚。另外，減少食濕糧都係一個好方法，主要食返乾糧，牙齒都無咁快唔靚架！
